07/07/2011 - Serimonia Tomada de Posse ba kordenadores no funsionarius STAE distritu

Desizaun politiku IV Governu Konstitusional RDTL hodi konverte funsionariu temporariu ba funsionariu publiku sai hanesan fase importante ida atu asegura funsionamentu estrutura institusaun governu hodi serve interese publiku. Realizasaun husi desizaun politika ne'e, maka Iha loron 07 Jullu 2011, hala'o serimonia tomada de posse ba kordenadores no funsionarius STAE hamutuk ema nain 71 husi distritu 12 hodi kompleta numeru funsionariu STAE nasional hirak nebe simu ona tomada de posse iha loron 1 fulan Jullu 2011, inklui STAE distritu Dili.

Serimonia tomada de posse nebe'e maka hola fatin iha edifisiu STAE, dirizi husi Director Jeral STAE ho Komisaria Isabel Ferreira, no akompaña husi, Pe. Jose Antonio Da Costa. Iha seremonia ne'e partisipa mos Ministru Administrasaun Estatal no Ordenamentu Teritóriu, Arcânjelo Leite, prezidente Comição Nacional das Eleições (CNE), Faustino Cardoso, komisaria husi Komisaun Funsaun Publik, Isabel Da Costa Ferreira, Provedor Direitu Humanus no Justica, Sebastião Dias Ximenes, segundu Komandante PNTL, Afonso de Jesus, RSSG ba Timor leste, Amerah Haq, Deputi RSSG, Fin Reske-Nielsen, Embaixador Japaun, reprezentante husi UNMIT-UNDP no konvidadus sira seluk inklui funsionarius STAE tomak.

Ministru Arcânjelo Leite, iha nia intervensaun apela ba empossados no funsionarius STAE sira atu bele servisu ho espiritu nasionalismu no profesionalizmu nudar funsionariu publiku tuir prinsipiu Imprasialidade, Neutralidade no Transparensia, Ministru ne'e mos husu ba emposados sira atu bele halo servisu diak liu tan hodi bele serve estadu no povo Timor leste.

Komisaria Isabel Da Costa Ferreira liu husi nia diskursu hateten katak, eleisaun hanesan prosesu fundamental ba estadu direitu no demokratiku, nune'e sidadaun hotu-hotu tenki respeita lei nebe'e iha, independentemente ba funsaun nebe sira hala'o, nebe ninia importansia maka eleisaun tenki livre no lós, atu nune'e sidadaun hotu-hotu bele hato'o sira nia hanoin, tamba ne'e hanesan parte husi servisu STAE ninian, nune'e nia mos haktuir liu tan ba empossados sira katak suksesu husi prosesu eleitoral depende servisu diak husi funsionarius STAE sira.

Iha fatin hanesan direitur jeral STAE hato'o ninia agradesementu ba Komisaun Funsaun Publik nebe fo ona tempu ketak hodi hala'o tomada de posse ne'e, no husu ba Funsaun Publik atu aselera prosesu rekrutamentu ba vagas iha STAE nebe'e maka persiza atu prienxe nune bele fasilita servisu STAE ninian. Diretur jeral STAE mos husu ba diretores iha ministeriu MAEOT tomak atu fo apoiu ba STAE hodi bele hasoru eleisaun jeral 2012.

Iha oportunidade ne'e mos Kordenador distritu Baucau Lucio Freitas Salvador lori naran empossados tomak hato'o agradesimentu ba IV Governu konstituisional RDTL tamba fo ona fiar ba sira hodi bele sai hanesan funsionarius publiku , no nia deklara katak sei esforsu a'an liu tan hodi bele servisu ho diak no profesional tuir prinsipiu STAE nian. Serimonia ne'e taka ho orasaun agradesementu nebe maka dirizi husi, Pe. Jose Antonio Da Costa.