02/04/2011 - Assinatura memorandum husi STAE - Tribunal Superior Eleitoral (TSE) Brazil

Iha loron 2 fulan Abril 2011, Director Jeral STAE, Tomas do Rosario Cabral, hala'o visita ba Brazil hodi partisipa iha enkontru kona-bá sistema eleitoral, nebe'e hala'o husi nasaun Comunidade dos Paises de Lingua Portuguesa (CPLP) no Timor leste mos sai hanesan membru husi CPLP ne'e.

Visita ida ne'e hetan konvite husi CPLP no partisipa husi membru CPLP tomak maka hanesan, Angola, Brazil, Cabo Verde, Guiné-Bissau, Moçambique, Portugal, São Tomé Príncipe ho Timor-Leste.

Iha enkontru ne'e Director Geral STAE mos aprezenta kona-bá orgaun administrasaun eleitoral iha Timor leste, hanesan STAE no CNE, no mos esplika kona-bá funsaun no aktividade eleitorais husi orgaun rua ne'e , no preparsaun STAE nian bá eleisaun jeral nebe'e sei hala'o iha 2012 mai ne'e.

Hafoin atu remata visita ida ne'e Director jeral STAE mos partisipa iha serimonia assina Memorandum entendementu husi STAE no Tribunal superior eleitoral (TSE) iha loron 6 fulan Abril 2011, ho ministro Ricardo Lewandowski husi tribunal superior eleitoral Brazil ninian, nebe'e konsidera katak Tribunal superior eleitoral (TSE) republika federativa Brazil iha interese no dispozisaun atu servisu hamutuk ho Timor leste hodi dezemvolve iha area eleitoral ho razaun husi deklarasaun konjunta nebe'e assina tia ona husi STAE no Comunidade dos Pais do Lingua Portuguesa (CPLP) iha fulan Outubru 2010. Asinatura nota entendementu ne'e hala'o ho abjectivu atu hametin koperasaun estadu rua ne'e no iha asinatura memorandum entendementu ne'e iha artigu ida maka koa'lia kona-bá apoiu nebe'e TSE sei fornese ba STAE liu husi assesora juridiku espesializada iha area eleitoral relativu ba etapa konsepsaun, implementasaun, no elaborasaun kodigu eleitoral iha Timor leste.