29/09/2010 - Reuniaun Konsellu Ministru

Konsellu Ministru sira hala´o reuniaun iha loron-29 fulan-Setembru tinan-2010, no halo análize no aprova tiha ona Proposta Alterasaun ba Lei Eleitorál ba Prezidente Repúblika. Iha reuniaun ne´e mós aprezenta no analiza Proposta Alterasaun ba Lei Órgaun Administrasaun Eleitorál no Proposta Alterasaun ba Lei Eleitorál ba Parlamentu Nasionál, ne´e-bé sei sujeita ba alterasaun foun molok atu aprezenta fila fali no aprova. Relativamente Proposta Alterasaun ba Lei Eleitorál ba Prezidente Repúblika, Alterasaun ba Lei nú. 7 / 2006 nia objetivu maka atu hadi´ak Lei ne´e, partikularmente iha nível prosedimentál, hasoru eleisaun jerál sira ne´ebé sei hala´o iha tinan-2012, aprova tiha ona.

Hanoin hikas ba katak Lei Eleitorál ba Prezidente Repúblika regula eleisaun ba orgaun soberania ne´e, símbolu no garante independénsia nasion´l, unidade Estadu no funsionamentu regulár ba instituisaun demokrátika sira. Ne´e asentua karakter independente no suprapartidáriu magistériu prezidensiál, define prinsípiu fundamentál sira relasiona ho kampaña eleitorál no estabelese norma jerál sira relasiona ho aprezentasaun kandidatura, modu eleisaun no prosesu votasaun.

Relasiona ho Aprezentaun Proposta Alterasaun ba Lei Órggaun sira Administrasaun Eleitorál, proposta Alterasaun Dahuluk ba Lei nú. 5 / 2006 iha nu´udar objetivu atu ajusta situasaun atuál ba órgaun sira administrasaun eleitorál tuir realidade Timor nian. Nesesidade ajustamentu ida-ne´e mosu husi experiénsia ne´ebé obtein iha eleisaun sira ne´ebé hala´o tiha ona, to´o tempu ida-ne´e, iha nasaun ne´e.

Ba ikus, Aprezentasaun Proposta Alterasaun ba Lei Eleitorál ba Parlamentu Nasionál pretende, ho projetu Alterasaun ba Lei nú. 6 / 2006 ne´e, atu modifika kestaun sira prosedimentál ho forma atu hadi´ak lei ne´e, tau iha konsiderasaun eleisaun parlamentár ne´ebé sei hala´o iha tinan-2012, nomeadamente sistematizasaun prosesu kandidatura ba eleisaun.